(andri kur)

clxxx

2011-12-30T19:48:00.001Z

föstudagur, 30. desember
... og enn heldur óvætturinn gylfi áfram för sinni. hér má sjá hann á ferðalagi sínu um rústir st. andrews kastala. umræddur kastali var byggður seint á tólftu öld af roger nokkrum de beaumont. kastalinn var vel nýttur í tæp fimmhundruð ár en þótti síðan skyndilega ekki lengur mönnum sæmilegur í lok sautjándu aldar. um svipað leyti og hugleysingjar slitu búkinn frá höfði jóns biskups arasonar á íslandi átti sér stað sögufrægt umsátur við kastalann: kaþólskir sátu þar um fylgisveina og -meyjar lúthers í hálft annað ár og reyndu með ráðum og dáðum að ryðjast inn fyrir kastalaveggina til þess að koma–að þeir sjálfir töldu allavega–vitinu fyrir félaga sína sem þar hýrðust.

clxxix

2011-12-15T20:20:00.003Z

fimmtudagur, 15. desember
... og er þá komið að öðrum kapitula í sögu gylfa. er hér kemur við sögu er gylfi að spóka sig á hinni svokölluðu löngu bryggju (long pier). til þess að forða lesendum frá leiðum misskilningi þykkir þó rétt að geta þess að langa bryggja er hvorki sérlega löng né gott bátalægi.

clxxviii

2011-12-08T20:30:00.001Z

fimmtudagur, 8. desember
til þess að kveðja st. andrews tók ég myndir af nokkrum helstu kennileitum þorpsins. í forgrunni þeirra má sjá lítið, gult og vinalegt skrímsli sem ber hið forna nafn gylfi. má því ef til vill segja að ég hafi—líkt og konungarnir hár, jafnhár og þriðji forðum—frætt gylfa í gervi ganglera um framandi ríki og íbúa þess.

er nú hér fyrsti þátturinn í sögu gylfa ...

clxxvii

2011-11-28T20:05:00.008Z

mánudagur, 28. nóvember
girðingar—og svosem veggir af sérhverju tagi—eru til margra hluta. það eitt, að halda einhverjum úti úti eða inni inni, er augljós kostur. en öllu djúpstæðari er samt eftirfarandi eiginleiki: við það eitt að reisa girðingu getur eitthvað sem áður var ekkert orðið úti eða inni eftir atvikum í einni andrá.

clxxvi

2011-11-24T20:49:00.004Z

fimmtudagur, 24. nóvember
stundum nægir að koma hversdagslegum hlutum á óvenjulega staði til þess að gera þá framandi.*

*og svo eru líka sumir sem gera alla hluti og alla staði framandi ...

clxxv

2011-11-14T19:18:00.006Z

mánudagur, 14. nóvember
spor í sandi eru ljóðrænn minnisvarði þess sem eitt sinn var; en jafnframt þörf áminning þess, hversu auðvelt það er, að vera vitur þegar allt er yfir staðið. það er ef til vill einmitt þess vegna að við íslendingar höfum löngum valið okkur öllu erfiðara markmið, nefnilega það, að vera vitlausir eftir á ...

clxxiv

2011-11-06T16:13:00.004Z

sunnudagur, 6. nóvember
sandkastalar hafa löngum þótt fyrirtaks myndlíking illa ígrundaðra athafna og afurða þeirra. ef til vill er samt stundum rétt að nema staðar, meta þá í sínu rétta ljósi og njóta þeirra í þau örfáu andartök er þeir standa.

clxxiii

2011-11-01T14:20:00.003Z

þriðjudagur, 1. nóvember

eftir ansi langt hlé, þá finnst tími til kominn að snúa aftur. að vísu er víking mínum fyrir löngu lokið en ég tek engu að síður enn myndir endrum og eins og stundum oftar en ekki. til þess að marka endurkomu mína ætla ég að útvarpa tveimur myndum af eyjum íslands. önnur úr flatey, þar sem í fjarska má sjá klofning, blindsker og stálfjall, hin frá reykjaströnd undan tindastól, þaðan sem sjá má drangey.

clxxii

2010-04-05T12:06:00.009+01:00

mánudagur, 5 apríl
ég tók þessar fjórar myndir á ferðalagi mínu um putaland.* eins og lemuel gulliver í sögu swifts varð áskynja, þá verður maður að stíga afar varlega til jarðar í putalandi.

*nei, þetta er ekki alveg samkvæmt sannleikanum: ég hef aldrei komið til putalands. hinsvegar, þá frétti ég um daginn að canon ætlaði að innbyggja svokallaðan miniature fídus í næstu kynslóð p&s véla sinna. lengi vel þá var aðeins hægt að ná svona myndum með þartilgerðum (og rándýrum) tilt-shift linsum. aftur á móti, fyrst hægt er að byggja svona lagað inn í litlar p&s vélar, þá dróg ég þá ályktun að hægt væri að ná þessum fídus fram í photoshop. og viti menn, eftir nokkrar tilraunir, þá náði ég ásættanlegum árangri. ég verð að viðurkenna að myndirnar sjálfar eru ekki sérlega spennandi en þær þjónuðu tilgangnum þó þokkalega. ég læt öðrum eftir að dæma hvort tilraunirnar hafi verið erfiðins verðar.

clxxi

2010-03-22T16:50:00.004Z

mánudagur, 22. mars
„mynd vikunnar“ er sennilega orðið ansi misvísandi lýsing á þessum gjörningi. allt of oft hafa vikurnar orðið afmyndaðar af einni eða annari ástæðu. og þónokkrar vikur hafa tekið á sig ófáar og afar ólíkar myndir. engu að síður, þá mætti færa fyrir því ágætis rök að ákveðna lýsingin „mynd vikunnar“ sé fyrir löngu orðin að nafni þessa fyrirbæris. í öllu falli, þá ætla ég að leyfa mér að lauma út nokkrum myndum í þeirri veiku von að ég mér leyfist kalla þær „mynd vikunnar“.

clxx

2010-03-08T22:48:00.005Z

þriðjudagur, 9. mars
já, seisei, hér eru þá nokkrar myndir til viðbótar frá íslandi. nánar tiltekið, þessar myndir eru teknar ofan af svokölluðum skeggja sem má finna án sérstakrar fyrirhafnar á hengilsvæðinu.

clxix

2010-03-01T21:11:00.009Z

mánudagur, 1. mars
já, ég bið yður auðmjúklega afsökunar. ég veit vel að ég hef ekki staðið mig upp á síðkastið. mér finnst það mjög leiðinlegt en þannig er það víst bara stundum. nei, ég get ekki einu sinni brugðið fyrir mig þeirri afsökun sem ég hef allra oftast gert hingað til: ég á engar myndir á reiðum höndum. þvert á móti, ég á alltof mikið af myndum í augnablikinu! sannleikurinn er bara sá að ég var eiginlega búinn gleyma þessu litla myndabloggi mínu. aum afsökun, já, en engu að síður sú sannasta sem ég get gefið. allavega, þar sem ég hef enga sérstaka trú á refsingum en þess meiri trú á betrun, þá vil ég sýna iðrun mína í verki: til þess að bæta upp fyrir þögn síðustu fimm vikna, þá færi ég nú fram, fullur auðmýktar og æðruleysis, jafnmargar myndir. já, myndirnar eru allar frá íslandi eins og það leit út fyrir mér síðastliðið sumar. um þær er ekki mikið meira að segja en það.

clxviii

2009-12-17T14:46:00.005Z

fimmtudagur, 17. desember
þetta er víst síðasta myndin í bili. á morgun mun ég hverfa á ný til föðurlandsins og gleyma mér í móðurmálinu í nokkrar vikur. þar til næst, takk. og já, ég óska yður vissulega gleðilegra jóla og farsældar á komandi ári. það er bara þannig.

clxvii

2009-12-11T13:40:00.004Z

föstudagur, 11. desember
mynd vikunar kemur alla leið frá ungverjalandi. já, hugsa sér bara ...

clxvi

2009-12-04T12:04:00.005Z

föstudagur, 4. desember
... og svo kom desember. mynd vikunnar er frá ungverjalandi. en í ungverjalandi berja styttur iðulega á ófreskjum. svona er það víst bara.

clxv

2009-11-23T11:42:00.004Z

mánudagur, 23. nóvember
góðu ellegar illu heilli, þá er komið að síðustu mynd vikunnar frá tilteknum kauða á þrítugsaldri. já, næsta mynd vikunar mun renna undan rifjum einhvers kumpána á fertugsaldri. ég þekki hann að vísu ekki enn en svo segir mér þó hugur að hann verði viðkunnalegar gaur. í öllu falli, ekki mikið verri en hinn. kannski ögn eldri og reyndari en alls ekki mikið verri. en hvað um það, mynd vikunnar er enn einu sinni frá búdapest.

clxiv

2009-11-16T16:03:00.005Z

mánudagur, 16. nóvember
ókei, ég kannski að renna ögn á rassinn með mynd vikunnar. já, ég gleymi mér aftur og aftur og aftur. hvað um það, betra seint en aldrei, nei? jú. þessi mynd er frá, já, búdapest.

clxiii

2009-11-09T00:22:00.001Z

sunnudagur, 8. nóvember
æi, ég gleymdi mér í síðustu viku. ég bið yður forláts. samt, ef við ímyndum okkur í andartak að vikan hefjist á mánudegi, svona eins og heilög ritning greinir okkur frá og fólk um víða veröld gefur sér, þá slepp ég kannski fyrir horn. hvað um það, mynd vikunnar er frá ungverjalandi. já, svona er um að litast sumstaðar í búdapest.

clxii

2009-10-29T11:01:00.005Z

fimmtudagur, 29. október
allir sem hafa reynt að taka ljósmyndir vita að sumar ljósmyndir eiga erfiðari fæðingu en aðrar. já, til eru jafnvel myndir sem hafa krafist þess að ljósmyndarinn leggi sjálfan sig eða viðfangsefni sín í hættu. þessi mynd er ágætt dæmi um slíkt. á myndinni má sjá ungverska ógæfumenn reyna að tæla til sín ferðamenn í svikamyllu. þegar þessir viðkunnalegu kumpánar urðu mín varir--sem var einmitt um það leyti sem þessi mynd var tekin--þá varð uppi fótur og fit. þeir reyndu hvað þeir gátu að hafa af mér myndvélina og hótuðu mér öllu illu. þrátt fyrir að vera besta skinn, þá er ykkar einlægur asni þéttur á velli þegar þannig viðrar. þegar þessir ágætu herramenn áttuðu sig á því að ég yrði ekki hræddur, þá hætti þeim að lítast á blikuna og þorðu loks ekki öðru en að hörfa með skottið á milli lappanna. og það þarf víst ekki fjörugt ímyndunarafl til þess að átta sig á því að verr hefði hæglega geta farið.

clxi

2009-10-18T22:58:00.002+01:00

sunnudagur, 18. október
ókei, aðeins einn bíll enn og svo er ég hættur ...

clx

2009-10-11T15:06:00.003+01:00

sunnudagur, 11. október
ég ætla að leyfa mér að lauma út fleirri bílum.

clix

2009-10-04T18:49:00.007+01:00

sunnudagur, 4. október
í búdapest kennir ýmisa grasa. til dæmis, þá má finna þar afar viðkunnanlega bíla. einkum og sér í lagi, já, þá má þar finna austurevrópskar og sovéskar bifreiðar í umtalsverðum mæli. nú, þegar ég var ungur, þá þóttu þessir bílar ekki merkilegur pappír. þeir þóttu eiginlega allra síðasta sort. það verður nú samt að segjast að þessir bílar hafa elst mun betur en margur eitt sinn ætlaði. já, við verðum að viðurkenna núna að það leynist ákveðin fegurð í þessum bílum. þeir búa yfir einstökum karakter sem tímans tönn hefur farið varlega um á meðan jafnaldrar þeirra eru flestir orðnir að óttalegum skrípum. ég ætla þessi orð allra síst sem einhvers konar predikun en ég ætla samt að leyfa mér að impra á sannleika sem oft vill gleymast: því er nefnilega þannig með svo afar margt farið, að tíminn verður bara að fá að leiða gildi þess í ljós. já, litli ljóti andarunginn leynist æri víða.

clviii

2009-09-30T12:14:00.003+01:00

miðvikudagur, 30. september
stundum gleymir maður sér. já, til að mynda, þá er ég kominn til skotlands fyrir þó nokkru síðan en einhvern veginn tókst mér að gleyma því að ég héldi úti svokallað blogg. kannski segir það meira um blogg en mig. það er ekki gott að segja samt. engu að síður, fyrst óminnishegrinn hefur kosið að kveðja mig, þá finnst mér aðeins við hæfi að byrja með mynd sem ætti ekki að vera. eiginlega óttalegri ómynd, ef svo mætti að orði komast.

clvii

2009-07-12T16:50:00.004+01:00

sunnudagur, 12. júlí
þá er komið að síðustu myndinni að sinni. ég held heim á leið eftir tæpa viku með örlitlum útidúr í ungverjalandi. þar til ég sný aftur í haust, þá bið ég þig vel að vera.

og já, þessi mynd er einnig frá manhattan. myndin er af hinni svokölluðu empire state byggingu.

clvi

2009-07-08T14:04:00.003+01:00

miðvikudagur, 8. júlí
enn önnur mynd vikunnar frá manhattan. en í manhattan fær maður stundum á tilfinninguna, eins og þessi litla kirkja, að háhýsin séu við það að hrynja á sig.

clv

2009-06-28T15:01:00.003+01:00

sunnudagur, 28. júní
enn önnur mynd frá manhattan. þessi mynd er tekin ofan af háhýsi í morgunsárið.

cliv

2009-06-21T01:00:00.001+01:00

sunnudagur. 21. júní
ég ætla að leyfa mér að lauma út tveimur myndum þessa vikuna. báðar myndirnar eru teknar af hinni svokölluðu brooklyn brú: sú fyrri í átt manhattan, sú seinni í átt að himni.

cliii

2009-06-14T14:53:00.006+01:00

sunnudagur, 14. júní
ennþá er það new york. mynd vikunnar er af svokallaðri brooklyn brú.

clii

2009-06-07T10:20:00.006+01:00

sunnudagur, 7. júní
ég ákvað að lauma frá mér tveimur myndum þessa vikuna. ég veit að slíkt er ósvífið og ónærgætið. en svona er ég bara. báðar myndirnar eru áframhald þema síðustu viku: háhýsi. þegar maður er fæddur og uppalinn á guðsvolaðri eyju þar sem moldarkofarnir rísa varla upp úr jörðinni, þá getur maður ekki annað en verið fullur lotningar frammi fyrir svona risavöxnum kumböldum. engu að síður, þá varð ég það líka.

cli

2009-05-31T01:00:00.000+01:00

sunnudagur, 31.maí
þessi litla mynd er einnig frá new york. en þar eru húsin sum svo há að þau kljúfa skýin ef svo viðrar. einmitt þess vegna eru þau kölluð skýjakljúfar.

cl

2009-05-24T01:10:00.003+01:00

sunnudagur, 24, maí
mynd vikunnar er frá columbia háskóla í new york. það er hin svokallaða alma mater sem sýnir okkur lítið þekktan baksvip sinn á þessari mynd.

cxlix

2009-05-17T01:00:00.001+01:00

sunnudagur, 17. maí
þessi litla mynd kemur alla leið frá miðgarði manhattan.

cxlviii

2009-05-12T15:14:00.002+01:00

þriðjudagur, 12. maí
jæja, þá er loksins komið að því: ég er búinn að framkalla og byrjaður að skanna. fyrsta myndin úr þessari seríu er frá alla leið frá new york.

cxlvii

2009-05-07T15:17:00.002+01:00

fimmtudagur, 7. maí
mynd vikunnar er önnur mynd úr náttúru íslands. þessi mynd er tekin í íshelli nærri hrafntinnuskeri. það er rétt að taka það fram að ég hef ekkert átt við þessa mynd: stundum er náttúran bara svona ónáttúruleg.

cxlvi

2009-05-02T21:29:00.002+01:00

laugardagur, 2. maí
þessi mynd tók ég einhverju sinni við rætur háskerðings. háskerðingur lætur ekki mikið yfir sér en af toppi hans má engu að síður sjá fleirri jökla en af nokkru öðru fjalli á íslandi.

cxlv

2009-04-27T17:34:00.003+01:00

laugadagur, 25. apríl

mynd vikunnar fann ég í fjöru fyrir nokkrum árum. ég biðst aumur afsökunnar á því að demba enn einni gamalli mynd hingað en ég stend mig illa í framköllunni þessa dagana. fljótlega, ég lofa, mun ég sýna hér ögn nýrri myndir.

cxliv

2009-04-20T12:25:00.004+01:00

laugardagur, 18. apríl
mynd vikunnar er frá austurströnd íslands. nánar til tekið, þessi mynd er tekin í þokunni í berufirði.

cxliii

2009-04-12T16:22:00.002+01:00

laugardagur, 11. apríl
mynd vikunnar hefur yfirleitt lítið með páska að gera. engu að síður, þá óska ég ykkur öllum inniega gleðilegra páska.

cxlii

2009-04-05T11:25:00.003+01:00

laugardagur, 4. apríl
semsagt, líkt og sumarið, þá er ég kominn aftur til skotlands. það er ekki margt hægt að segja um það sem hefur ekki þegar verið sagt. mynd vikunnar, aftur á móti ...

cxli

2009-03-29T22:37:00.003+01:00

laugardagur, 28. mars
þetta er, því miður, síðasta útsendingin frá osló að sinni. næsta mynd mun rata hingað alla leið frá st. andrews. mynd vikunnar, aftur á móti, er hvorki frá osló né st. andrews. segið svo að ég reyni ekki að hafa þetta allt saman ögn alþjóðlegt ...

cxli

2009-03-22T09:59:00.004Z

laugardagur, 21. mars
mynd vikunnar er alla leið frá hollandi. þrátt fyrir að svo megi virðast, þá hafa vélarnar samt ekki enn tekið völdin ...

cxl

2009-03-15T11:35:00.004Z

laugardagur, 14. mars
ég á því miður ekki meira tilkall til mynd vikunnar en það eitt að hafa tekið hana. fíll þess var lengi á vegg við hverfisgötu sem nú er hruninn. góðu heilli, þá náði ég mynd af honum áður en hann hvarf í rústunum. svona er heimsins lán stundum fallvallt.

cxxxix

2009-03-08T14:36:00.001Z

laugardagur, 7. mars
mynd vikunnar er frá austurlandi íslands um lágnætti.

cxxxiii

2009-03-01T18:15:00.002Z

laugardagur, 28. febrúar
mynd vikunnar er af tvöföldum regnboga í friðlandi að fjallabaki. í bakgrunni má sjá fjallið loðmund (eða lóðmund) sem góður maður sagði eitt sinn að lýsti umferð ferðamanna um svæðið. tilviljun?

cxxxii

2009-02-22T14:37:00.003Z

laugardagur, 21. febrúar
mynd vikunnar er eftilvill meira fyrir suma en aðra. en hvað um það, þetta er hún ...

cxxxi

2009-02-14T16:40:00.003Z

laugardagur, 14. febrúar
enn er ég í osló. og ég verð eiginlega að viðurkenna að ég kann stöðugt betur við mig hérna. ef satt best skal segja, þá veit ég eiginlega ekki hvort ég muni nokkurn tímann yfirgefa þessa borg með góðu. en nóg um það, hérna er mynd ...

(kannski hafa einhverjir séð þessa og síðustu mynd einhvern tímann áður og það er einföld ástæða fyrir því: ég er aðeins með filmuvél við höndina þessa dagana og hef ekkert framkallað lengi. ég vona að það fari ekki fyrir brjóstið á neinum að ég laumi nokkrum gömlum lörfum hingað.)

cxxx

2009-02-06T15:53:00.003Z

föstudagur, 6. febrúar
eftir örstutta viðkomu í hollandi er ég loksins kominn til noregs. sérhverjum finnst eflaust sitthvað um slíkt. því er einmitt ögn eins farið með mynd þessarar viku ...

cxxix

2009-01-26T18:42:00.007Z

mánudagur, 26. janúar
ekki aðeins er ég ósvífinn og óforskammaður, ég er einnig þrautseigur og afar forhertur í ósiðum mínum. með öðrum orðum, önnur mynd frá íslandi ...

og til þess eins að rugla ögn rímið, þá er fjallið ekki fjall, himininn ekki himinn, og skýin ekki ský. svona horfir heimurinn víst stundum undarlega við okkur.

cxxviii

2009-01-22T18:36:00.002Z

fimmtudagur, 22. janúar
og rétt sísvona, þá er ég aftur á ný kominn til skotlands. mynd vikunnar, aftur á móti, er alls ekki frá skotlandi. nei, síður en svo, þessi mynd kemur--ekki ólíkt mér--alla leið frá íslandi. svona er ég víst óforskammaður og almennt ósvífinn ...

cxxvii

2008-12-16T12:56:00.004Z

þriðjudagur, 16. desember
svona horfir víst við í höfninni í st. andrews.

og þar sem útlegðinni er næstum lokið að sinni, þá er þetta síðasta myndin í bili. þar til á nýju ári, lifið heil. já, gleðileg jól!

cxxvi

2008-12-14T12:30:00.002Z

laugardagur, 13. desember
mynd vikunnar er af hinum svokölluðu skosku hálöndum.

cxxv

2008-12-06T17:19:00.004Z

laugardagur, 6. desember
stuðlaberg.

cxxiv

2008-12-06T17:08:00.002Z

laugardagur, 29. nóvember
mynd vikunnar er svokölluð afmælismynd.

cxxiii

2008-11-20T15:00:00.003Z

fimmtudagur, 20. nóvember
þá er ég kominn aftur til skotlands frá new york. og til þess að fagna því, þá ætla ég að lauma frá mér einni mynd. þessi mynd er frá dómkirkju heilags magnúsar.

cxxii

2008-11-06T15:42:00.005Z

fimmtudagur. 6. nóvember
eftir nokkra daga á norðurlöndum, þá er ég kominn til skotlands enn á ný. ég veit vel að myndir vikunnar hafa verið ögn strjálar upp á síðkastið; slíkar eru víst afleiðingar stöðugra ferðalaga. en hvað um það, fyrst ég er staddur í skotlandi einmitt núna gat ég ekki stillt mig um að lauma einni ómynd frá mér. og til þess að bæta gráu ofan á svart, þá verð ég að viðurkenna að ég veit ekki einu sinni almennilega hvert myndefnið er að þessu sinni.

annars verð ég í útlöndum aftur í væstu viku, þannig að þessi mynd fær að trjóna hér efst um sinn.

cxxi

2008-10-17T19:58:00.003+01:00

föstudagur, 17. október
ókei, byrjum á því að afsaka okkur: ég er ekki búinn að setja mynd inn síðustu tvær vikur og mér þykir það leitt. mér til örlítillar málsvarnar, þá hef ég verið á faraldsfæti og þess á milli ögn upptekinn.

þessi mynd er einnig frá orkneyjum. en þar hefur steinn staðið yfir steini í hart nær sexþúsund ár.

cxx

2008-09-25T14:38:00.002+01:00

fimmtudagur, 25. september
þá er ég kominn aftur. fyrsta myndin að þessu sinni, rétt eins og síðasta myndin síðast, er frá orkneyjum.

cxix

2008-08-02T00:05:00.005+01:00

föstudagur, 1. ágúst
þar sem þessi litli geimfari hefur verið kallaður heim til móðurskipsins, þá er þetta síðasta myndinn að sinni. þar til ég sný aftur út í geim, þá bið ég þig vel að vera.

mynd vikunnar er frá orkneyjum. já, nánar til tekið, frá þorpinu kirkwall á meginlandi orkneyja. viðfangið er gildra af einhverju tagi: klárlega krabbagildra, held ég, en leiðréttu mig ef þú veist betur.

cxviii

2008-07-25T09:02:00.006+01:00

föstudagur, 25. júlí
meiri fiskur ...

á meðal nokkura annara, þá er orðið „fish“ í ensku svolítið sniðugt: orðið er bæði ein- of fleirtölumynd nafnorðsins „fish“ (fiskur), orðið er nútíðar fyrstu- og annararpersónu ein- og fleirtölumynd og nútíðar þriðjupersónu fleirtölumynd sagnorðsins „to fish“ (að fiska) og ennfremur, þá er orðið boðháttarmynd þessarar sömu sagnar. fyrir vikið, þá er sérhver strengur af i endurtekningum „fish“, þar sem i er einhver náttúruleg tala, málfræðilega rétt setning í ensku máli. leyfið mér að útskýra með dæmum.

þegar i er 1, þá er um að ræða boðháttarmynd sagnarinnar „to fish“:

fish.
[fiskaðu.]

þegar i er 2, þá er um að ræða einfalda [frumlag umsögn] setningu:

fish fish.
[fiskar fiska.]

þegar i er 3, þá er (meðal annars) um að ræða einfalda [frumlag umsögn andlag] setningu:

fish fish fish.
[fiskar fiska fiska.]

þegar i er 4, þá er (meðal annars) um að ræða [frumlag [frumlag umsögn] umsögn] setningu:

fish fish fish fish.
[fiskar [(sem) fiska fiska] fiska.]

(„meðal annars“ vegna þess að skilja má setninguna á nokkra vegu: [frumlag [frumlag umsögn] umsögn], [frumlag [umsögn] umsögn andlag], [frumlag [umsögn andlag] umsögn], [frumlag umsögn [frumlag umsögn]] og [frumlag umsögn andlag [umsögn]])

þegar i er 5, þá er (meðal annars) um að ræða [frumlag [frumlag umsögn] umsögn andlag] setningu:

fish fish fish fish fish.
[fiskar [(sem) fiska fiska] fiska fiska.]

og almennt, þegar i er stærra en 1, fyrir slétt i: [frumlag [i-2 [(sem) fiska fiska] innskotssetningar] umsögn]. og fyrir oddatölu i: [frumlag [i-2 [(sem) fiska fiska] innskotssetningar] umsögn andlag].

augjóslega má ekki leika sama leik í íslensku með „fiskur“ og „að fiska“ af nokkrum ástæðum. í fyrsta lagi, þá hefur íslenskan föll: frumlag sagnarinnar „að fiska“ er í nefnifalli (fiskar) og andlag í þolfalli (fiska). í öðru lagi, þá er boðháttur í eintölu iðulega myndaður með viðskeytinu „-tu“ eða „-ðu“ í íslensku máli: boðháttur sagnarinnar að fiska er „fiskaðu“. og í þriðja lagi, eins og í ensku, þá er þriðjupersónu fleirtölumynd sagna öllu að jöfnu frábrugðin fleirtölumynd samstofna nafnorða: orðið „fiska“ er einfaldlega frábrugðið orðinu „fiskar“.

af þessum ástæðum, þá gæti suma grunað að íslenskan sé of málfræðilega fullkomin til þess að leyfa svipaðan leik með nokkru orði. það kemur því eflaust á óvart að orð sem leynist í sjálfum kjarna málsins skuli leyfa annað eins: sögnin „að vera“ er fullkomlega tilfallin í þennan skrípaleik. svona förum við að: orðið „var“ er bæði framsöguháttar þátíðar þriðjupersónu ein- og fleirtölumynd sagnarinnar „að vera“ og eintölu nefni- og þolfallsmynd hvorukyns nafnorðins „var“. nafnorðið „var“ merkir meðal annars: (1a) hlé, skjól; (1b) öryggi; (1c) viðvörun; (2) slím eða óhreinindi í auga; (3) lítil hreyfing vatns við ártog, uppitak eða vak. til þess að setningarnar sem við myndum verði bæði setningafræðilega og merkingarfræðilega tækar, þá skulum við nota okkur merkingu (1a) hér á eftir.

byrjum á byrjuninni. „var“ er eðlileg styting á „vertu var“: ekki ólkt „(vertu) góður“, „(vertu) hjóður“ og „(vertu) spakur“. hins vegar, þegar kemur að öllum lengri strengjum af i „var“ samskeytum, þá horfir eins við og fyrir „fish“ í ensku: fyrir slétt i: [frumlag [i-2 [(sem) var var] innskotssetningar] umsögn]. og fyrir oddatölu i: [frumlag [i-2 [(sem) var var] innskotssetningar] umsögn andlag].

og af þessum sökum, þá eru eftirfarandi setningar allar málfræðilega réttar setningar í íslensku máli:

var.
var var.
var var var.
var var var var.
var ... var.

en nóg um það.

cxvii

2008-07-21T21:20:00.002+01:00

mánudagur, 21. júlí
úps, afsakið: ég er víst ögn seinn á mér þetta sinnið. en hvað um það, betra seint en aldrei hafa þeir sagt. seint koma sumir en koma þó. góðir hlutir gerast hægt. allt á sér sinn stað og tíma ...

cxvi

2008-07-12T11:51:00.003+01:00

laugardagur, 12. júlí
stundum er það manni holt að sjá náttúruna í öðrum litum ef ekki til annars en þess eins að hjálpa manni að meta hana enn betur í sínum réttu litum.

cxv

2008-07-06T13:22:00.004+01:00

laugardagur, 5. júlí
það er sagt að dropinn holi harðan stein. það er trúlega satt en það skiptir ekki öllu máli. það sem skiptir mun meira máli er sú staðreynd að þetta fallega orðtak finnst víða í íslensku máli: það þarf nefnilega ekki nema aðeins andartaks umhugsun til þess að átta sig á því hversu mikla bjartsýni þessi litla myndhverfing tjáir. enn fremur, að því marki að annað eins hafi fest sig í málinu upplýsir okkur hversu ofboðslega bjartsýnt fólk íslendingar eru stundum.

cxiv

2008-06-25T18:38:00.005+01:00

miðvikudagur, 25. júní
hér er enn frekari stuðningur staðhæfingar minnar að fiskar finnist í sjónum umhverfis ástralíu. að vísu er þetta ekki afgerandi sönnun, því vel má ímynda sér stangveiðimenn án fiska. aftur á móti, ef við gerum ráð fyrir að ástralir séu ekki alvitlausir, þá megum við leiða líkur að því að þeir fiski ekki til einskins. já, gott fólk, svona gerir heimspekin mann rökglöggan: áralöng rifrildi um eitthvað sem engan skiptir minnsta máli hefur svo sannarlega sína fylgifiska: við höfum upp úr þessu öllu saman örfáa hagnýta hæfileika ...

cxiii

2008-06-22T18:06:00.008+01:00

laugardagur, 21 júní
enn erum við stödd í ástralíu. að þessu sinni er það strandþorpið lorne. hérna er það mögulega ekki í þeirri birtu sem það vill helst kannast við sig en svona er það víst bara: ef maður er þorp, þá er erfitt að fela sig fyrir ágengum ljósmyndurum ...

cxii

2008-06-12T21:40:00.004+01:00

fimmtudagur, 12. júní
þvert á skjön við allar mínar væntingar, þá finnst víst fiskur í sjónum við ástralíu. já, ég hef séð þá með eigin augum.

cxi

2008-06-05T13:01:00.001+01:00

fimmtudagur, 5. júní
þar sem ég hef staðið mig illa í útsendingu mínum síðustu tvær vikurnar, þá er bara sjálfsagt að ég fái að lauma annari mynd þessa vikuna. og ef ekki, þá má einnig benda á það að „ég á'etta, ég má'etta“ eins og sagt er.

sjálfsagt eður ei, þessi mynd er einnig frá ástralíu.

cx

2008-06-03T12:01:00.002+01:00

þriðjudagur, 3. júní
já, ég veit, ég hef ekki staðið mig. ef það er einhver afsökun, þá er ég búinn að vera á ferðinni og síðan afar upptekinn frá því ég kom aftur til skotlands fyrir rúmri viku.

en hvað um það, nóg um blaður í bili, myndir ... þessi kom með mér alla leið frá ástralíu.

cix

2008-05-12T08:12:00.004+01:00

mánudagur, 12. maí
niður með náttúruna, sagði magnús þór jónsson, því nóg hefur hún oss bölin brýnt. kannski er það satt, en samt sem áður, eða kannski einmitt þess vegna, þá finnst mér ögn vænt um hana. ónáttúra eða ei, mynd vikunnar sýnir okkur einmitt enn einu sinni títtumrædda náttúru.

og já, eftir aðeins þrjá daga held ég enn á ný til skotlands. ég mun að vísu viðkoma nokkur norðurlönd á leiðinni en að því loknu, þá ætti ég að finna sjálfan mig aftur í st. andrews. þar til þá, ...

cviii

2008-05-05T03:30:00.006+01:00

mánudagur, 5. maí
það hefur verið sagt að ég sé gefinn fyrir náttúru. já, stundum hef ég jafnvel verið úthrópaður og uppnefndur náttúrubarn. ég verð að viðurkenna að ég veit ekki alveg hvað slíkt þýðir en ég held það sé ekkert ljótt. hvað um það, hérna er í öllu falli önnur mynd úr náttúrunni.

cvii

2008-05-02T03:00:00.003+01:00

föstudagur, 2. maí
þá er maí. á norðurhveli jarðar, þá ber maí ætíð með sér fögur fyrirheit sumarsins. underlega, samt sem áður, þá virðist einmitt hið gagnstæða gilda hér: nefnilega, hérna er haustið loksins kærkomið. það sagt, þá er þetta auðvitað allt ögn afstætt. þó það sé farið að kólna svolítið, þá er enn hérna eins og júlí á íslandi. engu að síður, þá virðist sálin átta sig á því að haustið hafi þegar hafist. það er því örlítð skrítið til þess að hugsa að eftir aðeins nokkra daga verður enn á ný vor umhverfis mig. já, maður verður ansi ringlaður á svona löguðu. það er ekki nóg að hin hefðbundna tímabeltisháða þotuþreyta muni grípa mig, það er einnig öllu undarlegri árstíðarbundin þotuþreyta sem bíður mín í ofvæni.

en nóg um það. hérna er mynd vikunnar. ögn meiri náttúra til þess að ríma við myndir undanfarna vikna.

hliðarblogg

2008-04-27T03:51:00.002+01:00

sunnudagur, 27. apríl
ef til vill hafa glöggir lesendur rekið augun í hlekkinn hér til hægri sem stafar „the gorging lodge“. tja, ef ekki, þá er tími til kominn ...

þessi síða er eins konar hliðarblogg sem við sambýlisfólkið í skotlandi höldum úti saman. eins og nafnið gefur kannski til kynna, þá er þetta blogg helgað mat og matargerð. en já, það er nefnilega einmitt ástríða okkar fyrir mat sem sameinar okkur.

hvað um það, mér þótti bara rétt að benda á þetta, fyrir þá sem ekki höfðu séð þetta áður, og útskýra fyrir ykkur hinum. gott fólk, leyfið mér að kynna: the gorging lodge.

cvi

2008-04-25T02:38:00.003+01:00

föstudagur, 25. apríl
þar sem ég gleymdi mér á ferðalögum mínum síðustu viku, þá er bara réttlátt að ég fái að lauma inn tveimur myndum þessa vikuna. þessi mynd er einnig úr títtumræddum minnamurraskógi.

cv

2008-04-24T15:00:00.007+01:00

fimmtudagur, 24. apríl
afsakið þögnina: ég er búinn að vera á hinum svokallaða faraldsfæti síðustu dagana. góðu heilli, þá er ég samt nú kominn enn á ný til melbourne. það hefur eitt og annað í för með sér og meðal annars fleirri myndir vikunar ...

eins og sú síðasta, þá er þessi mynd einnig úr minnamurraskógi. myndin er af æri undarlegum trjáberki. þrátt fyrir allt, þá segja þeir mér að þetta mynstur sé sjálfspottið. ætli það þýði samt eitthvað?

civ

2008-04-12T03:24:00.004+01:00

laugardagur, 12. apríl
þessi mynd er úr hinum svokallaða minnamurra regnskógi. regnskógar eru afar merkileg fyrirbæri. einmitt, eiginlega mun merkilegri en mig óraði fyrir áður en ég fann sjálfan mig í miðjum slíkum. það er einkum tvennt sem vakti ómælda undrun mína og er þess vegna vert að segja frá. annars vegar, þvert á allar mínar fyrri hugmyndir, þá rignir ekki stöðugt í regnskógum. já, eiginlega mun sjaldnar en ekki. og hins vegar, sem ekki kom mér minna á óvart, þá er ögn kalt í regnskógum. í öllu falli mun kaldara en utan þeirra. já, við það eitt að stíga inn fyrir jaðarinn, þá lækkaði hitinn um allavega tíu gráður.

já, svona veit maður víst lítið þegar maður elst upp innan um jökla, í stöðugri lægðarmiðju og umkringdur kuldaskilum á sérhvern kant.

ciii

2008-04-06T01:18:00.004+01:00

laugardagur, 5. apríl
í sidney má finna feiknarstóra og afar vel staðsetta styttu af kerlingu einni sem þegnum breska heimsveldisins þykir æri mikið til koma. já, meira en sjálfrar díönnu prisessu og margrétar thatcher til samans. sagt er að umrædd kerling hafi haft til að bera sérhverja dyggð sem þeir telja góða konu skuli prýða. í hugum heimsborgaranna er hún sjálf holdgerving kvenlegs þokka og fyrirmynd fegurðar. já, gott fólk, þetta er sko engin önnur en viktoría drottning.

ég verð samt að viðurkenna, sem afdaladurgur frá guðsvoluðum útnára á hjara veraldrar sem skortir allan fagurfræðilegan þroska og skynbragð, að ásjóna þessarar kerlingar minnir mig einna helst á teikninguna af grýlu í vísnabók iðunnar sem hræddi næstum úr mér líftóruna barnungum.

cii

2008-03-30T02:14:00.003+01:00

laugardagur, 29. mars
og rétt sísvona, þá er ég aftur kominn úr nokkra daga ferðalagi um canberra, kiama og sidney.

mynd vikunnar er samt sem áður aðeins frá melbourne. það vill nefnilega þannig til að endrum og eins og oftar en ekki, þá heyri ég raddir sem tjá óánægju vegna manneklu mynda minna. þrátt fyrir að ég sé óforskammaður og forhertur með endemum, þá er ég samt alltaf allur af góðum vilja gerður. þess vegna, gott fólk, leyfið mér að kynna: fólkið í melbourne ...

ci

2008-03-20T02:19:00.004Z

fimmtudagur, 20. mars
ci er 101. ekki nóg með það, 101 er einmitt besta póstnúmer sem ég hef nokkurn tímann átt mér í samastað. mynd vikunnar er hins vegar úr póstnúmeri 3000. já, ímyndið ykkur bara ...

c

2008-03-14T11:20:00.003Z

laugardagur, 15. mars
'amm, c. það er einmitt rómverska talan fyrir eitt hundrað. já, 100. hundraðasta vika myndar vikunnar. já, það eru hundrað vikur fjarri föðurlandinu og móðurmálinu. hundrað vikur fjarri vinum og vandamönnum. það er langur tími fyrir lítinn mann.

en þessum víking er hvergi nærri lokið. enn er nóg eftir af útþrá í mér. já, kæru lesendur, ævintýri mín eru rétt aðeins að hefjast ...

hundraðasta mynd vikunnar er frá melbourne. kannski útskýrir þessi mynd sig sjálf og kannski gerir hún það ekki. í öllu falli, þá ætla ég ekki að gera það.

segið mér ...

2008-03-09T02:34:00.018Z

miðvikudagur, 12. mars
á eftir (sumu) fólki, þá þykir mér um fátt jafnvænt og íslensk mál. já, jafnvel þó ég sé illtalandi og nánast með öllu óskrifandi á þessu fallega máli, þá þykir mér samt sem áður ofboðslega vænt um það.

sem slíkur unnandi þessa máls, þá hef ég ögn gaman af hverskyns þrálátum málfarsvillum. lengi vel hafa beygingarvillurnar „góðan daginn“ og „ég vill“ verið í sérlegu uppáhaldi hjá mér. það var síðan um daginn, þegar ég las enn einu sinni einn dýrmætasta arf okkar, að ég rak augun í svolítið sem fékk mig til þess að staldra við og hugsa. þannig vill til að á fyrstu síðu forns handrits, sem ber skráningarheitið „de la gardie nr. 11, 4°“, stendur skrifað:

bók þessi heitir edda. hana hefir saman setta snorri sturlusonur eftir þeim hætti sem hér er skipað.

eins og nánast sérhver íslendingur veit, þá hefur nafnorðið „sonur“ eftirfarandi beygingarmyndir í eintölu án greinis: sonur (nf.), son (þf.), syni (þgf.) og sonar (ef.). samt sem áður, þá eru kenninöfn sem frumlög í íslensku iðulega beygð í þágufalli þegar þau ættu, setningarfræðilega allavega, að standa í nefnifalli. þegar „sonur“ er frumlag setninga, þá segjum við til að mynda „sonur segir ...“ en ekki „son segir ...“. engu að síður, þá segum við „hjálmarsson segir ...“ en ekki „hjálmarssonur segir ...“. (takið samt eftir að bæði fleirtölumyndin „synir“ og „dóttir“ og „dætur“ eru rétt beygðar í daglegu máli.)

því spyr ég, hverju veldur? er þetta aðeins enn önnur beygingarvilla? ef svo, þá sennilega sú algengasta þeirra allra? er þetta eitthvað sem við höfum tekist að klúðra niður síðan snorri sturlusonur var á meðal okkar? tja, segið mér. nema einhver geti gefið mér svar við þessu, þá neyðist ég til þess að draga þá ályktun að um rangt mál ræði. einmitt, gott fólk, leyfið mér að kynna mig, ég heiti guðmundur andri hjálmarssonur.

xcix

2008-03-09T01:04:00.007Z

laugardagur, 8. mars
ástralía er feikn gróðursæll reitur. það tengist eflaust öðru fyrirbæri, ástralía er einkar veðursæl. það er því aðeins viðeigandi að mynd vikunnar skuli einmitt vera af innfæddri plöntu. gott fólk, leyfið mér að kynna, ástralskt tré.

tja, eða í öllu falli hluta þess ...

xcviii (i, ii og iii)

2008-02-29T01:38:00.010Z

föstudagur, 29. febrúar
dagurinn í dag er merkilegur fyrir þónokkrar sakir. einkum þó, þá er 29. febrúar merkilegur fyrir það að bera aðeins að fjórða hvert ár. og ekki einu sinni það, því á fjögurhundruð ára fresti, þá líða átta ár á milli þessa dags. en af hverju er það merkilegt? það er merkilegt vegna þess að þessi dagur minnir okkur á þá staðreynd að allar okkar tilraunir til þess að koma kerfi á raunveruleikann eru dæmdar til þess að mistakast. tímatalið er auðvitað bara hentugt dæmi, þar sem dagurinn í dag er aðeins snjöll tilraun til þess að bjarga gömlu og grónu kerfi frá glötun: fjórða hvert ár, þá er einum degi bætt við, að undanskildu fjögurhundraðasta hverju ári, því þá yrði leiðréttingin of mikil. og samt, þrátt fyrir þessar tilraunir, þá er það ekki alveg nóg, eftir nokkur þúsund ár, þá verður skekkjan orðin svo mikil að við neyðumst til þess að fitla ögn við kerfið til þess að leiðrétta á ný ...

og hvað? nú, þannig er þessu háttað með allar okkar kenningar: þær eru ekkert nema tilraunir til þess að koma einhvers konar kerfi á raunveruleika sem reynist alltaf einu skrefi á undan. auðvitað, sé vel að verki staðið, sem vissulega er ekki alltaf raunin, þá ættu kenningar okkar að færast nær og nær sannleikanum. en hvort þær nái einhvern tímann í skottið á honum, já, þar er efinn. og þetta, gott fólk, er ástæða þess að dagurinn í dag er merkilegur: einmitt, hann er kærkomin áminning einhvers sem við ættum aldrei að gleyma.

nóg um það, ég vil ekki að þetta blogg verði að enn einu kjaftablogginu. það verður seint sagt, „nei, vanþörf er sjaldnast á því“. einmitt, myndir, það er það sem þetta snýst allt um hérna. myndir vikunnar eru aftur þrjár. allar frá melbourne. og allar úr sitthvorri áttinni.

á meðan fyrri tvær myndirnar eru aðeins einskonar áferðarmyndir, þá er sú þriðja af pípulögnum melbourne. mér þótti þetta svo skemmtileg útfærlsa að ég gat bara alls ekki staðist að taka þessa mynd.

xcvii (i, ii og iii)

2008-02-22T07:19:00.000Z

föstudagur, 22. febrúar
... og melbourne leggst betur í mig með hverjum deginum. já, eftir að hafa búið í misstórum þorpum allt mitt líf, þá eru kostir stórborganna stöðugt að renna betur upp fyrir mér. þó það sé ýmislegt til í hinu fornkveðna, að við vitum varla hvað átt höfum fyrr en misst höfum, þá er ívið meira til í því, að við vitum alls ekkert fyrr en við átt höfum.

en hvað um það. myndir vikunnar eru ekki færri en þrjár og það vill svo skemmtilega til að þær eru allar frá títtumræddri borg. eins og gengur og gerist, þá eru þessar myndir allar úr sitthvori áttinni. ég held samt að þær útskýri sig nokkurn veginn alveg sjálfar, ég læt því þennan kjaftavaðal nema staðar hér. takk fyrir að lesa.

xcvi

2008-02-16T07:15:00.004Z

laugardagur, 16. febrúar
ég er nokkuð viss um að þið hélduð að ég væri alveg búinn að gleyma ykkur. enn ein vikan að kvöldi sínu kominn og engin mynd sjáanleg. en nei, svona er ég lúmskur ...

mynd vikunnar er frá melbourne. í melbourne er eitt og annað og sumt sem gerir borgina að því sem hún annars er. eitt af því eru ögn ólögulegar en engu að síður heillandi rafmagnslínur í loftinu. mynd vikunnar er einmitt ef slíku víravirki.

um fjarlæga staði

2008-02-14T06:59:00.005Z

fimmtudagur, 14. febrúar
til þess að gera langa sögu styttri, þá er ég samsagt heill á húfi í ástralíu. af því takmarkaða sem ég hef séð hér og annars upplifað, þá finn ég mig knúinn til þess að fullyrða að melbourne sé ansi viðkunnalegur staður. eiginlega er ég tilbúinn til þess að ganga ögn lengra og fullyrða að melbourne sé með allra huggulegustu borgum sem hafa rekið á fjörur mínar.

ef svo kynni að vera að einhverjum langi til þess að senda mér póstkort eða lengri línur, þá er póstfangið mitt „8/29 hotham street, 3002 east melbourne, melbourne, victoria, australia“. (að sjálfsögðu tek ég einnig við ímeilum, en ég spyr, hvar er nú sjarminn við það?) auk þess þá er ég hérna með nýmóðins símstöð sem tekur á móti símtölum, textaskilaboðum og ég veit ekki hverju ekki. til þess að tengjast umræddu undraapparati, þá má stimpla inn númerið 00-61-413411203 í þartilgerð viðtæki.

þar til næst, góðar stundir.

um mögulega heima

2008-02-03T03:21:00.001Z

sunnudagur, 3. febrúar
það tekur mig sárt að tilkynna tiltekinn heimsendi. örvæntið samt ekki, þetta eru aðeins endalok mögulegs heims. eimitt það, vegna illskiljanlegra tiktúra vefhýsils míns, þá get ég ekki lengur haldið úti vefsíðunni „possible-world.net“. en við grátum það ekki, farið hefur víst féið öllu betra ...

þetta er samt engin ástæða til þess að fara í keng, ég mun að sjálfsögðu halda áfram útsendingum mínum héðan. og ekki aðeins það, næsta útspil verður frá ekki ómerkari stað en ástralíu. ímyndið ykkur það!

xcv

2008-02-01T13:32:00.000Z

föstudagur, 1. febrúar
hafið hefur lengi heillað jafnt sem hrætt. á sinn ógnarstóra hátt er það okkur áminning um stöðu okkar og smæð í veröldinni. ekki aðeins það, hafið hefur í gegnum tíðirnar haft vald yfir lífi og dauða, markað skilin, ef svo má að orði komast, á milli himnaríkis og helvítis. en hafið er samt ekki alvont, því það færir okkur einnig líf í skiptum fyrir þau sem það hefur tekið frá okkur: við værum ekki án hafsins. og auk þess, sem er öllu mikilvægara, þá býr hafið yfir ómældri fegurð sem hefur fangað huga mannanna og innblásið frá örófi alda. já, gæti maður sín ekki, þá getur maður hæglega gleymt sér starandi á hafið lífið á enda.

mynd vikunnar er einnig frá vesturströnd skotlands. það er engin tilviljun að myndin sýni einmitt ungan mann fastan í greipum hafsins.

eftir tvo daga held ég svo ferð minni áfram til ástralíu. góðu eða illu heilli, þá mun ég að sjálfsögðu reyna að halda áfram myndasögu minni þaðan. þar til þá, ta-dah.

xciv

2008-01-25T22:10:00.000Z

föstudagur, 25. janúar
hananú. þá er ég víst kominn til skotlands enn á ný. nú vill samt þannig til að ég stoppa aðeins stutt við að þessu sinni. einmitt, ekki nema í tvær vikur. að því tilefni er ég að hugsa um að hafa næstu (tvær) myndir frá þessu umrædda skotlandi. mynd vikunnar er einmitt af einkar viðkunnalegum verkamannabústað á vesturströnd skotlands.

eftir rúma viku held ég svo áfram leið minni til ástralíu. ég mun að sjálfsögðu reyna að halda útsendingum mínum áfram þaðan. þar til næst, þá bið ég ykkur annars vel að vera.

xciii

2007-12-10T10:54:00.000Z

þriðjudagur, 11. desember
hananú, þá er víst komið að síðustu myndinni að sinni. ástæða þess er afar einföld: næstkomandi sunnudag held ég enn á ný á vit ævintýranna til íslands. ég vona innilega að einhverjum kunni að finnast slíkt tilhlökkunarvert. en þrátt fyrir að ég gangi að slíku sem vissu, þá þykist ég samt vita að fáum finnist eins ofboðslega mikið til þess koma og mér: ég hef aldrei hlakkað jafn hræðilega til þess að koma heim og einmitt núna.

en hvað um það, mynd vikunnar er áframhald af ættjarðaróð undanfarna vikna. myndin að þessu sinni er einnig úr þjóðgarðinum við skaftafell. þessi mynd er tekin af skaftafellsheiði til austurs í þeirri birtu sem mér finnst hvað íslenskust. á myndinni má sjá skaftafellsjökul og svínafellsjökul. þeirra á milli er hafrafell með sína alræmdu efrimenn, fremrimenn og illukletta. á bak við svinafellsjökul má sjá svínafellsheiði, þar sem skarðatindur gnæfir hæðst og skyggir ásamt stöku skýji á hvannadalskamb. ögn ofar í skýjunum leynist svo dyrhamar og hvannadalshnjúkur. en eins og allir vita, þá er umræddur hvannadalshnjúkur hæðsta fjall hins íslenska heimsveldis.

allavega, þetta er kveðjustund að sinni. svona að lokum vil ég því óska öllum gleðilegra jóla og alls hins besta. takk fyrir allt.

xcii

2007-12-06T17:58:00.000Z

fimmtudagur, 6. desember
og nú, gott fólk, erum við loks komin í þjóðgarðinn við skaftafell. í umræddum þjóðgarði má finna svokallaðan svartafoss. þess má til gamans geta að eftirfarandi mynd er einmitt tekin undir fyrrnefndum fossi.

xci

2007-12-01T23:19:00.000Z

laugardagur, 1. desember
það er náttúrlulega við hæfi að ég haldi áfram í dag, á afmælisdegi fullveldis íslands. enn um sinn erum við stödd á suðurlandi, nánar til tekið við dyrhóley. sagan segir að dyrhóley hafi runnið undan rifjum jarðar fyrir eitthundraðþúsund árum, eða á síðasta svokallaða hlýskeiði ísaldar. já, ímyndið ykkur bara.

xc

2007-11-21T23:03:00.000Z

miðvikudagur, 21. nóvember
og ótrauð höldum við leið okkar áfram. að þessu sinni nemum við staðar við svokallað jökulsárlón. sagan segir að aðeins tíundi hluti marandi ísjaka standi upp úr kafi. ef satt, þá er æði langt niður á botn jökulsárlóns. heillandi nokk, leitt að þetta aðeins lífseig mýta og vésögn.

lxxxix

2007-11-14T20:56:00.000Z

miðvikudagur, 14. nóvember
áfram höldum við ferð okkar um ísland. að þessu sinni er áfangastaður okkar við viðkunnalegan lítinn foss nokkurn að skógum undir eyjafjöllum. (engin verðlaun eru í boði fyrir hvern þann eða þá sem nefnt getur fossinn.)

lxxxviii

2007-11-08T15:50:00.000Z

fimmtudagur, 8. nóvember
áfram held ég ótrauður með ættjarðaróð minn: myndin að þessu sinni er tekin í reynisfjöru í átt að dyrhólaey.

lxxxvii

2007-10-31T21:05:00.000Z

fimmtudagur, 31. október
hér með er hafið tímabil ljósmynda af ólíkum hliðum íslands. það er við hæfi að fyrsta myndin í þessari ættjarðarseríu skuli einmitt vera af þingvöllum. nánar tiltekið, þá er þessi mynd af öxará.

lxxxvi

2007-10-25T19:20:00.000+01:00

fimmtudagur, 25. október
enn önnur mynd úr þokunni í st. andrews. og já, stundum er skyggnið ögn betra hérna.

lxxxv

2007-10-16T18:45:00.000+01:00

þriðjudagur, 16. október
þessi mynd er frá fornri götu í litlu og vinalega þorpi á vesturströnd skotlands. gatan kallast skólastræti og þorpið heitir eftir einum lærisveina jesús. fyrir einhvern kann hvort um sig að hafa einhverja merkingu, en fyrir mér er þetta bara gatan þar sem skrifstofan mín leynist. nánar tiltekið: á bak við fyrstu hurðina til vinstri finnst ég stundum fyrir.

lxxxiv

2007-10-13T22:23:00.000+01:00

laugardagur, 13. október
og einmitt þegar þið hélduð öll að ég hefði gleymt ykkur, þá læði ég inn einni mynd í vikulokin. þessi mynd er af bryggjunni minni í st. andrews. ég hef að vísu áður tekið myndir af þessari bryggju--til að mynda hér og hér--og fyrir slíka endurtekningu bið ég ykkur afsökunnar. mér til málsvarnar get ég aðeins imprað á því sem ég hef áður sagt: þetta er lítið þorp.

lxxxiii

2007-10-03T11:34:00.000+01:00

miðvikudagur, 3. október
í hraða og firð nútímans þá vill það oft gleymast að við búum enn að miklu leyti í bændasamfélagum. stundum þarf maður jafnvel að finna sig úti á miðjum akri til þess að átta sig á þeirri staðreynd.

lxxxii

2007-09-25T15:07:00.000+01:00

þriðjudagur, 25. september
svona horfa hlutirnir við í heimsborginni st. andrews.

lxxxi

2007-09-18T22:33:00.000+01:00

þriðjudagur, 18. september
í goðafræði okkar segir af því þegar óðinn, vili og vé borssynir fundu tvö tré í fjöru. talsvert hefur þessum bræðrum til trjánna koma, því óðinn gaf þeim önd og líf, vili vit og hræring og vé ásjónu, mál, heyrn og sjón. tréin nefdu þeir emblu og ask og af þessum kvistum ólst allt mannkyn. afganginn vita víst allir.

á göngu minni fann ég einnig tré í fjöru. augljóslega ekki einn ása, gat ég hvorki gefið önd, líf, vit, hræring, ásjónu, mál, heyrn né sjón. þess í stað gerði ég það litla sem ég gat: ég tók mynd.